Policia greke ka arrestuar dy persona në Selanik, një 35-vjeçar me origjinë greke dhe një 39-vjeçar shqiptar, të cilët akuzohen për kultivim, trafik dhe posedim të lëndëve narkotike. Mediat e huaja raportojnë se gjatë një kontrolli në banesën e tyre, autoritetet zbuluan një laborator të përgatitur për kultivimin e kanabisit, ku u gjetën 75 bimë kanabisi, duke e kthyer banesën në një “shtëpi bari”.

Gjatë kontrollit, policia sekuestroi gjithashtu 7 pako me marijuanë të papërpunuar me peshë totale 2.4 kilogramë dhe 2 pako me kanabis të përpunuar (çokollatë) me peshë 68 gramë. Përveç kësaj, u konfiskuan dy automjete, 980 euro cash dhe dy celularë.

Të arrestuarit janë dërguar në Prokurorinë e Shkallës së Parë të Selanikut, ku do të përballen me akuzat për aktivitetin e tyre kriminal.