Kryeministri Edi Rama, gjatë një takimi me pensionistët, ndau pikëpamjet e tij mbi rritjen e pensioneve, duke theksuar se çdo kryeministër do të dëshironte t’i rrisë pensionet, por paralajmëroi për rrezikun e një veprimi të tillë pa një plan të mirë menduar. Ai bëri një krahasim dramatik me situatën e piramidave financiare të vitit 1997, duke shpjeguar se një rritje e pakontrolluar e pensioneve do të krijonte pasoja të rënda për ekonominë e vendit.

“Rritja e pensioneve pa menduar, pa një plan të qartë, do të ishte si të hapje një gropë të madhe për Shqipërinë, madje më të madhe se ajo e piramidave në vitin 1997,” u shpreh Rama. Duke theksuar rëndësinë e një planifikimi të qëndrueshëm, ai vuri në dukje se skema aktuale e pensioneve është universale dhe ofron mbulim për të gjithë, përfshirë pensionin social për ata që nuk kanë paguar kontribute të mjaftueshme.

Rama gjithashtu sqaroi rolin e shtetit në sigurimin e mbulimit financiar për pensionistët dhe shërbimet shëndetësore. “Pensioni social që kemi vendosur është i vogël, por skema jonë është universale. Buxheti i shtetit siguron 1 miliard euro për pensionet dhe shëndetësinë,” tha ai.

Kreu i qeverisë vuri theksin te rëndësia e marrëveshjeve ndërkombëtare, si ato me Italinë, të cilat i japin shqiptarëve që punojnë jashtë mundësinë të përfitojnë kontributet e tyre për pensionet. “Ne gjetëm vetëm një marrëveshje ndërkombëtare për shqiptarët që jetojnë jashtë, ndërsa në 10 vitet e fundit kemi arritur më shumë se 20 marrëveshje të tilla. Kjo bën që shqiptarët të përfitojnë kontributet e tyre, pavarësisht se ku ndodhen,” tha ai.

Në fund, Rama përmendi se në vitin 2022, përveç pensioneve, janë dhënë edhe tre bonuse për pensionistët, si pjesë e përpjekjeve të qeverisë për të mbështetur financiarisht këtë shtresë të popullsisë.