Këtë fundjavë, akrepat e orës do të shkojnë 60 minuta mbrapa. Sipas traditës, ora dimërore do të futet në funksion të dielën e fundit të tetorit, që për këtë vit përkon me datën 27 tetor. Si zakonisht, ndryshimi do të ndodhë rreth orës 03:00 të mëngjesit. Për përdoruesit e aparateve të celularëve smart, ndërrimi bëhet automatikisht.
Lëvizja e akrepave të orës si fenomen ndodh dy herë në vit: në javën e fundit të tetorit dhe në të dielën e fundit të marsit, kohë kur ora shkon përpara. Synimi i kësaj lëvizjeje është të shfrytëzohet sa më mirë energjia diellore. Historia e ndryshimit të orës në Europë është e ndryshme dhe ka filluar të përgjithësohet nga viti 1974, pas krizës së parë të naftës, kur disa vende vendosën të çonin përpara orën për të shfrytëzuar më shumë dritën e diellit dhe për të reduktuar konsumimin e energjisë elektrike.
Pyetja është, a kanë vendet e tjera ndryshim të orës? Në hemisferën veriore, shumica e vendeve në Evropë dhe Amerika e Veriut respektojnë kohën e kursimit të ditës (DST). Egjipti është i vetmi vend në Afrikë që ndryshon orën gjatë verës. Izraeli, Palestina dhe Libani gjithashtu praktikojnë kursimin e ditës. Në hemisferën jugore, ndërrimi i orës ndodh në disa pjesë të vogla të Amerikës së Jugut dhe Oqeanisë.
Megjithatë, jo çdo vend respekton të njëjtën datë për të ndryshuar orën. Për shembull, në Australi, orët shkuan përpara (për verën e saj) më 6 tetor të këtij viti, ndërsa në Shtetet e Bashkuara, orët do të kthehen më 3 Nëntor. Të gjitha këto vende, përveç një, e ndryshojnë orën me një orë të plotë. Ishulli Lord Howe, i cili ndodhet në brigjet lindore të Australisë, rregullon kohën me 30 minuta, duke e vendosur atë në të njëjtën zonë kohore me Uellsin e Ri Jugor gjatë verës.
