Monika Kryemadhi ka reaguar pas akuzave që rëndojnë mbi të dhe bashkëshortin e saj, Ilir Meta, duke theksuar se ai nuk është përfshirë në menaxhimin e financave familjare. Në një deklaratë për mediat jashtë Gjykatës Kundër Korrupsionit dhe Krimit të Organizuar (GJKKO), Kryemadhi tha se gjithmonë ajo është kujdesur për faturat dhe deklarimin e pasurisë, duke shtuar se Ilir Meta nuk është i informuar as për gjëra të thjeshta, si çmimi i një shisheje uji, pasi, sipas saj, ai pi vetëm ujë çezme.

“Ilir Meta nuk është marrë me asgjë. Faturat i kam paguar unë. Ai nuk e di sa kushton një shishe ujë sepse pi ujë çezme. Deklarimin e pasurisë gjithmonë e kam bërë unë, jo ai,” tha Kryemadhi.

Në të njëjtën kohë, Kryemadhi hodhi poshtë akuzat që lidhen me përdorimin e parave të dyshimta, duke pohuar se çdo shpenzim i saj është i deklaruar dhe nëse do të kishte para për të fshehur, nuk do të përdorte kartë bankare që lë gjurmë. Ajo nuk hezitoi të kritikojë edhe prokurorët e SPAK, duke i akuzuar për mungesë transparence dhe për përfitime të paligjshme.

“Po të kisha para për të fshehur, s’do përdorja karta bankare që lënë gjurmë, por do përdorja para cash, si prokurorët që udhëtojnë nga Morina e Prishtina për të shmangur daljet në aeroport,” shtoi Kryemadhi, duke bërë edhe insinuata për shpenzimet e tyre personale.