Kryeministri Edi Rama, gjatë një takimi për të diskutuar masat kundër informalitetit, ka propozuar idenë që pagat e qytetarëve të bëhen publike, si në disa vende nordike, për të luftuar evazionin fiskal. Rama theksoi se qeveria nuk do të pranojë më deklarime pagash që nuk janë realiste, duke përmendur si shembull ndërtuesit, të cilët shpesh deklarojnë paga që nuk përkojnë me të vërtetën.

“Nuk do pranojmë më deklarime pagash që nuk i besojmë,” u shpreh Rama, duke specifikuar se paga prej 60 mijë lekësh të rinj në sektorin e ndërtimit nuk është e besueshme dhe se deklarimet e tilla do të refuzohen nga autoritetet. Ai paralajmëroi se kompanitë që nuk do të korrigjojnë deklarimet e tyre do të përballen me pasoja serioze, deri në kolaps financiar.

Rama gjithashtu kritikoi ndërtuesit që ndërtojnë pallate dhe shesin apartamente me çmime të larta, ndërkohë që deklarojnë paga të ulëta për punëtorët e tyre. Ai e cilësoi këtë sjellje si një provokim ndaj shtetit dhe një ofendim ndaj inteligjencës së njerëzve.

Duke theksuar se qeveria po shqyrton mundësinë që pagat të bëhen publike, Rama tha se kjo do të ishte një masë drastike, por e nevojshme për të rritur transparencën dhe për të parandaluar evazionin në tregun e punës.