Kryeministri Edi Rama deklaroi sot se informaliteti i pagave është një armik i pensioneve dhe pensionistëve, duke paralajmëruar se nuk do të tolerohen më deklarime pagash fiktive. Ai bëri këto komente gjatë një takimi me Ministrin e Ekonomisë, Blendi Gonxhja, Ministrin e Brendshëm, Ervin Hoxha, dhe Ministren e Shtetit për Sipërmarrjen dhe Klimën e Biznesit, Delina Ibrahimaj, ku po prezantohej plani për luftën ndaj informalitetit me strukturat tatimore.
Rama theksoi se ka respekt për sipërmarrësit që ndjekin besimin e tyre, por u shpreh se ata shpesh nuk paguajnë sigurimet shoqërore siç duhet. Ai i paralajmëroi ata se duhet të mbajnë parasysh pasojat e veprimeve të tyre. “Ka xhenet por dhe xhenem. Qoftë dhe për të mos marrë mallkimin e pensionistëve,” tha ai.
Ministri Blendi Gonxhja, në fjalën e tij, evidentoi se është vënë re një rritje e tentativave për të shmangur rregullat dhe përfituar në mënyrë të padrejtë nga tregu. Ai raportoi se 63% e subjekteve janë në shkelje, duke përfshirë mosdeklarimin e pagës dhe mungesën e kontratave. Gonxhja gjithashtu njoftoi se 1,984 punëmarrës informalë janë futur në skemën e pagës formale falë inspektimeve.
Rama u shpreh se ndërtuesit që do të deklarojnë paga fiktive prej 60 mijë lekësh nuk do t’i pranohen, dhe do të përballen me pasojat e veprimeve të tyre. “Merreni seriozisht,” tha ai, duke theksuar se do të merren masa të thella inspektuese për të garantuar transparencën dhe ndershmërinë në deklarimin e pagave. Ai përmendi mundësinë e miratimit të një ligji për publikimin e pagave, duke i bërë thirrje bizneseve të respektojnë rregullat dhe të kontribuojnë për mirëqenien e pensionistëve.
