Pas përfundimit të seancës në GJKKO, ku u rikonfirmua masa e “arrestit në burg” për ish-presidentin Ilir Meta, avokati i tij, Genc Gjokutaj, ka folur për mediat. Ai e cilësoi arrestimin dhe procesin gjyqësor kundër Metës si një veprim politik, të ngjashëm me atë që po ndodh ndaj Sali Berishës.

Gjokutaj deklaroi se Meta nuk ka udhëtuar në SHBA për lobim, por në cilësinë e Kryetarit të Kuvendit të Shqipërisë. Sipas tij, Meta është arrestuar për shkak të rolit të tij si lider opozitar, duke theksuar se arrestimi i tij ishte një vendim i paralajmëruar dhe i nxitur politikisht. Gjokutaj gjithashtu vuri në dukje se 34 volumet e paraqitura në gjykatë nga 190 që pretendon prokuroria nuk përmbajnë prova të rëndësishme.

“Arsyeja e arrestimit është me këtë cilësi, si lider i opozitës. Vendim i paralajmëruar, patë rrëmbimin. Nuk ka asgjë në ato volume. Bëmë mbrojtjen tonë, dhe vendimi ishte politik, një vendim që e prisnim. Do ndjekim rrugën e ankimit,” tha Gjokutaj.

Avokati theksoi se Meta nuk ka humbur qetësinë gjatë procesit dhe ka mbajtur një ton të lartë për të mbrojtur veten, duke argumentuar fuqishëm në seancë. Ai sqaroi gjithashtu se paraburgimi është një vendim i marrë nga drejtoria e burgjeve, ndërsa akuzat për lidhjet me biznesmenë dhe shumat e papërcaktuara financiare i quajti “marrëzi” dhe pa baza.