Prokuroria e Posaçme Kundër Korrupsionit dhe Krimit të Organizuar (SPAK) ka dorëzuar më 23 tetor 2024 në Gjykatën e Posaçme të Shkallës së Parë për Korrupsionin dhe Krimin e Organizuar kërkesën për gjykim të procedimit penal nr.18/2023, duke akuzuar të pandehurit Besjan Ramaj, Leonard Ramaj dhe Ardjan Malasi për pastrim parash dhe krijimin e një grupi të strukturuar kriminal. Ndërkohë, Rajmonda Dashi akuzohet për bashkëpunim në këtë aktivitet.
Sipas dokumenteve të siguruara nga autoritetet belge, të pandehurit Besjan dhe Leonard Ramaj janë dënuar më parë nga gjykatat belge për veprimtari të lidhura me trafikimin e narkotikëve, ndërsa Besjan Ramaj është dënuar për të njëjtat vepra edhe në Norvegji në vitin 2012.
Hetimet tregojnë se grupi ka qenë i angazhuar që prej vitit 2010 në aktivitete të paligjshme për pastrimin e të ardhurave, përmes investimeve në pasuri të paluajtshme, shitblerjes së pronave dhe transaksioneve financiare fiktive. Në këtë skemë, shoqëria “Ledio 04” sh.p.k. ka qenë një nga instrumentet kryesore për përfshirjen e parave të padeklaruara në ekonomi.
Në kuadër të hetimeve, janë sekuestruar:
1. 12 apartamente në Fier,
2. Një dyqan prej 300m² në Fier,
3. Një ullishte prej 5,200 m² në Mallakastër,
4. Katër apartamente në Tiranë,
5. Tre ambiente me funksion garazh në Tiranë,
6. Një shoqëri tregtare,
7. Dy automjete.
SPAK deklaroi se hetimi përfshinte bashkëpunimin me autoritetet belge dhe norvegjeze për të siguruar informacion lidhur me aktivitetin kriminal të të akuzuarve. Gjithashtu, organet hetimore kanë vënë në dukje përdorimin e metodave të sofistikuara për fshehjen e origjinës së parave, përmes lëshimit të faturave fiktive dhe krijimit të transaksioneve të fshehta bankare.
