Mbrojtja Civile e Gazës ka deklaruar se ushtria izraelite ka kryer një “masakër masive,” duke sulmuar të paktën 10 ndërtesa banimi në kampin e refugjatëve Jabalia, në veri të Rripit të Gazës. Sipas burimeve të Al Jazeera, sulmet kanë shkaktuar një numër të madh viktimash, ndërsa Agjencia palestineze e lajmeve Wafa raporton për rreth 150 të vdekur dhe të plagosur.

Në të njëjtën kohë, mediat raportojnë për vrasjen e tre gazetarëve në Libanin Jugor, pas një sulmi izraelit ndaj një shtëpie të përdorur si rezidencë nga shtypi në Hasbaya, rreth 50 kilometra në jug të kryeqytetit libanez. Ndër viktimat janë fotoreporteri Ghassan Najjar, Mohamed Reda nga gazeta pro-iraniane Al-Mayadeen dhe një fotoreporter i Al-Manar, kanal i lidhur me Hezbollahun.

Sekretari amerikan i Shtetit, Antony Blinken, ka planifikuar një takim në Londër me kryeministrin libanez, Najib Mikati, për të diskutuar ofensivën izraelite ndaj Hezbollahut dhe për të bërë thirrje për mbrojtjen e civilëve libanezë. Blinken ka qenë më parë në Lindjen e Mesme, ku kërkoi një armëpushim të menjëhershëm dhe mbrojtje të civilëve.

Një raport i publikuar nga “Wall Street Journal” tregon se Rusia ka ndihmuar grupin Houthi në Jemen, duke u ofruar të dhëna satelitore për anijet perëndimore në Detin e Kuq. Këto të dhëna iu kaluan Houthive nëpërmjet anëtarëve të Gardës Revolucionare Islamike të Iranit për të zgjeruar sulmet e tyre, të cilat, sipas Houthive, janë në mbështetje të palestinezëve në Gaza.

Gjithashtu, Forcat e OKB-së për Paqeruajtje në Libanin Jugor (UNIFIL) kanë denoncuar se janë sulmuar nga Izraeli pranë bazave të tyre. Ndërkohë, raportohet për tre ushtarë sirianë të vrarë nga bombardimet në kufirin siriano-izraelit. Hezbollah njoftoi se është kundërpërgjigjur, duke sulmuar tre tanke të Forcave të Mbrojtjes së Izraelit (IDF). Raketat e lëshuara nga Libani sot shkaktuan vdekjen e një gruaje dhe një të riu në zonën e Galilesë, në veriun e Izraelit, duke shtuar tensionet në rajon.