Dy ushtarë iranianë u vranë si pasojë e sulmeve ajrore izraelite gjatë natës, sipas raportimeve nga mediat shtetërore iraniane. Agjencia e lajmeve IRNA transmetoi një deklaratë nga ushtria iraniane, e cila theksoi se ushtarët “sakrifikuan veten duke mbrojtur sigurinë e Iranit, popullin dhe interesat kombëtare të Republikës Islamike”.
Republika Islamike e Iranit ka akuzuar Izraelin, duke e quajtur atë një “regjim kriminal sionist”, për sulmet që dyshohet se ishin të fokusuar në bazat dhe instalimet ushtarake iraniane. Të paktën gjashtë sulme me shënjestër të lartë nga avionët luftarakë izraelitë në perëndim të kryeqytetit iranian shënojnë një përpjekje të dukshme nga ana e Izraelit për të përmbushur premtimin se sulmi me 180 raketa balistik më 1 tetor nuk do të kalonte pa përgjigje. Në të njëjtën kohë, këto sulme dërgojnë një mesazh të qartë në Teheran se luftëtarët e Tel Avivit janë të gatshëm të godasin çdo objektiv që dëshirojnë në Iran në çdo kohë.
BBC po ashtu analizon situatën një ditë pas sulmit, duke shtruar pyetjen e rëndësishme nëse Irani do të vendosë të reagojë ndaj bastisjeve izraelite. Korrespondenti i rrjetit britanik në Jerusalem, Jeremy Boëen, theksoi se sulmet izraelite ndaj objektivave ushtarake iraniane ishin të pritshme, duke pasur parasysh se Irani kishte sulmuar me raketa balistike më 1 tetor.
Presidenti i SHBA-së, Joe Biden, i kërkoi kryeministrit izraelit, Benjamin Netanyahu, të kufizojë sulmet ndaj objektivave ushtarake dhe të shmangë goditjet ndaj objekteve bërthamore, naftës dhe energjisë të Iranit. Netanyahu duket se ka ndjekur këtë këshillë, në shpresën se sulmet e synuara do të parandalojnë përshkallëzimin e mëtejshëm nga Irani.
Megjithatë, dinamika e vazhdueshme e sulmeve dhe hakmarrjeve ngre shqetësime, pasi çdo mospërgjigje nga Irani mund të interpretohet si një shenjë dobësie. Ky përshkallëzim i ndërsjellë mund të çojë në tension më të madh dhe potencialisht në një konflikt më të gjerë.
Për momentin, Izraeli po vazhdon gjithashtu një fushatë të madhe sulmuese në Rripin verior të Gazës, ku komuniteti ndërkombëtar shpreh shqetësim të thellë. Shefi i OKB-së për të Drejtat e Njeriut, Volker Turk, e përshkroi situatën në Gaza si “momentin më të errët” të luftës, duke thënë se bllokada dhe bombardimet e vënë të gjithë popullsinë në rrezik nga uria dhe viktimat masive.
Koha e sulmeve të Izraelit ndaj Iranit ngre pyetje nëse qëllimi është të largohet vëmendja ndërkombëtare nga operacioni në Gaza. Pavarësisht spekulimeve, është e vështirë të përcaktohet motivi pas strategjisë së Izraelit në këtë fazë. Megjithatë, paralelisht me këto kriza, situata përballë përpjekjeve për paqe dhe stabilitet në rajon bëhet gjithnjë e më e komplikuar.
Sipas rrjetit Axios, Izraeli ka dërguar një mesazh Iranit para kryerjes së sulmeve, duke paralajmëruar Teheranin që të mos përgjigjet. Burime të njohura për këtë çështje kanë thënë se ky mesazh kishte për qëllim të frenonte sulmet e vazhdueshme midis Izraelit dhe Iranit, duke parandalur një përshkallëzim më të gjerë. Një burim ka theksuar se “Izraeli ia ka bërë të qartë Iranit paraprakisht se çfarë do të synojë dhe çfarë jo”, duke shtuar se nëse ka ndodhur ndonjë përgjigje, do të pasonte një sulm më serioz, sidomos nëse do të ishin përfshirë civilët izraelitë.
