Nënkryetari i Partisë Demokratike dhe drejtuesi politik i Lezhës, Agron Gjekmarkaj, ka ftuar qytetarët të bashkohen në një akt mosbindjeje civile më 29 tetor, ku synohet bllokimi i rrugës në Milot. Megjithatë, duke parë fotot e publikuara nga ky event, duket se kjo thirrje për protestë ka marrë një dimension tjetër, duke u shfaqur si një gosti e shtruar me verë, raki dhe meze, ku kryebashkiaku demokrat Albert Melyshi kishte kujdesur në çdo detaj.

Gjekmarkaj e karakterizoi mosbindjen civile si një qëndresë kundër “regjimit” aktual, i cili, sipas tij, po përdor arrestimet politike si një armë për të frikësuar dhe shtypur drejtuesit e opozitës. “Në tokën e katedraleve, të besës, qëndresës dhe lirisë! Mirdita e 600 viteve liri! Me 29 tetor, të gjithë në Milot për të ndaluar neo-diktaturën që kërkon të shtypë opozitën dhe përdor arrestimet si mjet frikësimi,” u shpreh ai.

Gjekmarkaj e përshkroi këtë veprim si një betejë për Shqipërinë europiane, duke dënuar lidhjet e qeverisë me “narko-sky enkroçat.” Ai theksoi se Mirdita mbetet simbol i fjalës së lirë dhe përballjes, duke kërkuar angazhimin e qytetarëve për të mbrojtur vlerat dhe liritë e fituara me mund.

Thirrja e Gjekmarkajt është një pasqyrim i tensioneve politike në vend dhe sinjalizon një përpjekje të opozitës për të mobilizuar mbështetje masive në një kohë kur ndihen presione të mëdha nga qeveria.