Sekretari i Përgjithshëm i Partisë së Lirisë, Tedi Blushi, iu bashkua protestës së organizuar nga Partia Demokratike në kuadër të mosbindjes civile, duke deklaruar se beteja e qytetarëve të ndershëm është tashmë në një fazë të re dhe më të vendosur. Gjatë një deklarate për gazetarët, Blushi akuzoi ashpër “Narkoshtetin”, të cilin e cilësoi si përgjegjës për “rrëmbimin në mes të ditës” të ish-presidentit të Republikës, Ilir Meta. Sipas Blushit, autoritetet po provokojnë qytetarët paqësorë të cilët, siç theksoi ai, janë të vendosur për t’u përballur me këtë regjim.

“Qytetarët e ndershëm dhe patriot nuk tremben,” deklaroi Blushi. “Sot, protesta dhe beteja e qytetarëve të ndershëm është në një etapë të re. Ky regjim kriminal duhet ta harrojë se mund të ndalojë revoltën e qytetarëve,” vazhdoi ai, duke akuzuar qeverinë për provokime të qëllimshme ndaj protestuesve paqësorë që, sipas tij, “nuk kanë hedhur asnjë gur sot”.

Blushi e përmbylli deklaratën e tij me një paralajmërim të ashpër ndaj qeverisë dhe përfaqësuesve të drejtësisë. “Në zjarrin e destabilizimit që po ndez Edi Rama, do të digjet vetë bashkë me prokurorët mercenarë, që janë kthyer në vrasës me pagesë,” tha ai.