Policia e Dibrës ka arrestuar një çift të rinjsh dhe një 17-vjeçare për shantazhimin e një adoleshenteje tjetër 17-vjeçare me foto dhe video personale në rrjetet sociale. Sipas njoftimit të policisë, adoleshentja shantazhohej që t’u jepte para, në mënyrë që ata të mos i publikonin materialet intime.

Operacioni i koduar “Blackmail” u finalizua nga Shërbimet e Sektorit për Hetimin e Krimeve Kibernetike, në bashkëpunim me Komisariatin e Policisë Mat. Gjatë hetimeve, u dokumentua ligjërisht aktiviteti kriminal i të arrestuarve, të cilët krijonin profile në rrjetin social “Instagram” dhe shantazhonin 17-vjeçaren, duke i kërkuar vlera monetare për të mos publikuar fotot dhe videot e saj intime.

Policia arrestoi shtetasit I.M., 23 vjeç, S.M., 24 vjeç (burrë dhe grua) dhe një 17-vjeçare, e cila ka lidhje familjare me I.M. Të gjithë ata banojnë në fshatin Komsi, Mat. Gjatë operacionit, u sekuestruan 15.000 lekë si dhe katër celularë, të cilat shërbyen si prova materiale.

Materialet e çështjes i kaluan Prokurorisë për veprime të mëtejshme.