Një aksident rrugor ka ndodhur sot në aksin Pogradec-Lin, në zonën e njohur si Guri i Kuq. Dy automjete që udhëtonin në drejtime të kundërta janë përplasur me njëra-tjetrën, duke shkaktuar lëndime për dy persona.

Sipas informacioneve paraprake, dy të lënduarit janë dërguar me urgjencë në spitalin e Pogradecit, ku raportohet se janë jashtë rrezikut për jetën. Ndërkohë, në vendin e ngjarjes ka mbërritur policia, e cila po punon për të zbardhur plotësisht rrethanat e aksidentit. Dyshohet se shpejtësia e lartë e njërit prej mjeteve ka qenë shkak për përplasjen.

Në njoftimin zyrtar të Policisë thuhet se ngjarja ka ndodhur rreth orës 17:10 në aksin rrugor “Korçë-Pogradec”, në afërsi të fshatit Guri i Kuq. Automjeti tip “Audi”, me drejtues shtetasin F. Y., është përplasur me automjetin tip “Opel”, me drejtues shtetasin A. M., dhe automjetin tip “Ford”, me drejtues shtetasin H. H.

Si pasojë e përplasjes, janë dëmtuar drejtuesi i automjetit tip “Ford”, shtetasi H. H., dhe bashkëshortja e tij, shtetasja Xh. H., të cilët aktualisht ndodhen në spital nën kujdesin e mjekëve. Ndërkohë, drejtuesi i automjetit tip “Audi”, shtetasi F. Y., është shoqëruar në ambientet e Komisariatit për veprime të mëtejshme procedurale.

Policia njofton gjithashtu se grupi hetimor ndodhet në vendngjarje për të kryer hetimet e nevojshme dhe për të përcaktuar shkakun e saktë të aksidentit.