Leonard Luzi, i akuzuar për organizimin e vrasjes së Ervis Matodashajt dhe Inez Hajrullasë në qytetin e Vlorës, është ekstraduar sot nga Spanja. Ky zhvillim vjen një vit pas ngjarjes së rëndë dhe pas hetimeve intensive që kanë lidhur Luzin me krimin.

Emri i Leonard Luzit u përmend për herë të parë në media nga Alda Nikolli më 18 korrik, në një intervistë. Në atë intervistë, Nikolli akuzoi Nuredin Dumanin, i cili është i penduar dhe aktualisht ndodhet në burg, se po vazhdon aktivitetin kriminal nga brenda qelisë, duke vendosur gjoba për individë të ndryshëm, përfshirë edhe Leonard Luzin.

Ajo shtoi se Dumani, i njohur për aktivitetet e tij kriminale, kishte detyruar Amarildo Nikollin të pranojë akuzat kundër tij dhe kishte vendosur gjobë mbi 400 mijë euro për të. Nikolli theksoi se Dumani kishte ndërmarrë praktika të ngjashme edhe ndaj Luzit, duke e detyruar të paguante për të shmangur pasoja të tjera.

Ky informacion ka ngjallur më shumë dyshime lidhur me rrjetet kriminale që operojnë brenda dhe jashtë institucioneve të drejtësisë. Ekstradimi i Luzit nga Spanja është një hap i rëndësishëm në drejtim të drejtësisë dhe të zbardhjes së plotë të ngjarjeve që lidhen me vrasjen e Matodashajt dhe Hajrullasë.