Antonio Vinicius Lopes Gritzbach, një biznesmen brazilian dhe ish-anëtar i grupit kriminal të njohur si PCC, është qëlluar për vdekje në aeroportin Guarulhos në Sao Paulo. Ngjarja ka ndodhur me gjakftohtësi, kur një person i armatosur hapi zjarr ndaj Gritzbach, pasi ai doli nga një makinë e zezë e parkuar jashtë Terminalit 2 të aeroportit. Në përplasjen që pasoi, tre persona të tjerë u plagosën.

Momenti i ekzekutimit u regjistrua nga kamerat e sigurisë, ku dy persona të armatosur me automatikë dolën nga një makinë dhe filluan të qëllonin jashtë terminalit. Gritzbach, i cili kishte marrë kërcënime për jetën nga banda kriminale braziliane PCC, hodhi çantën dhe u përpoq të arratisej, por u qëllua me breshëri plumbash dhe vdiq në vendngjarje.

Gritzbach, një ekspert i kriptomonedhave, kishte ndihmuar PCC-në të pastronte miliona dollarë, duke u bërë një figurë kyçe në aktivitetet kriminale të bandës. Sipas mediave braziliane, ai ishte i njohur për rolin e tij në pastrimin e parave të grupit, një marrëdhënie që kishte çuar deri në një marrëveshje me autoritetet. Në këmbim të një uljeje të dënimit për akuzat e pastrimit të parave, Gritzbach kishte premtuar të ndihmonte hetuesit për të zbuluar anëtarët e tjerë të PCC-së.

PCC (Primero Comando da Capital), e krijuar në gusht 1993, është banda më e fuqishme dhe e rrezikshme e Brazilit, duke kontrolluar tregjet e drogës, rrugët e kontrabandës, dhe madje edhe burgjet. Grupi ka zgjeruar lidhjet ndërkombëtare, duke krijuar aleanca me prodhuesit bolivianë të kokainës dhe mafiozët italianë, duke kontrolluar rrugë të rëndësishme trafiku droge, që lidhin Bolivinë dhe Brazilin me Evropën dhe Afrikën.

Biznesmeni, i akuzuar për pastrim parash për PCC-në, kishte hyrë në një marrëveshje me prokurorët për të dhënë informacion rreth organizatës, por tragjikisht ai u ekzekutua para se të mund të ndihmonte hetimet. Videot e publikuara në rrjetet sociale tregojnë momentin kur Gritzbach qëllohet për vdekje jashtë aeroportit, duke i dhënë fund jetës së një prej lojtarëve më të rëndësishëm të krimit të organizuar në Brazil.