Një ngjarje tragjike ndodhi në aeroportin e Rinasit, ku punonjësi i sigurisë i kompanisë “Illyrian Guard”, Han Draxhoshi, humbi jetën pas një aksidenti, kur ra në kontakt me energjinë elektrike gjatë detyrës së tij tek Albcontrol.

Familjarët e viktimës kanë shprehur shqetësimin e tyre lidhur me reagimin e kompanisë “Illyrian Guard”, duke pohuar se deri tani nuk kanë marrë asnjë mbështetje nga ana e saj dhe nuk është treguar përkujdesje e duhur për të ndihmuar familjen në këtë moment të vështirë. Ata theksojnë se pas aksidentit, vetëm kolegët e punës u kujdesën për transportimin e Draxhoshit në spital, ndërsa kompania dhe shërbimi i ndihmës së shpejtë nuk kanë reaguar në kohë.

Një tjetër shqetësim i madh për familjarët është mungesa e një raporti policor mbi ngjarjen, gjë që ngre pyetje mbi masat e sigurisë në vendin e punës dhe përgjegjësinë e kompanisë për të siguruar kushte të sigurta për punonjësit e saj. Ata kërkojnë një hetim të plotë dhe që “Illyrian Guard” të mbajë përgjegjësi për rrethanat që çuan në këtë incident fatal.

Kjo ngjarje ka shkaktuar reagime të forta nga familjarët dhe opinioni publik, duke kërkuar transparencë dhe veprime të shpejta nga autoritetet për të zbardhur rrethanat e tragjedisë dhe për të siguruar përgjegjësinë e duhur të kompanisë.