Martesa e Chiara Ferragni dhe Fedez duket se ka marrë fund pas gjashtë vitesh dhe dy fëmijëve, Leone dhe Vittoria. Sipërmarrësja dixhitale dhe reperi janë gati të nënshkruajnë një marrëveshje ndarjeje dhe divorci, duke i dhënë kështu fund një lidhjeje që kishte bërë miliona fansa të ëndërrojnë.

Në muajt e fundit, fansat e Ferragnit janë përballur me tensione publike, me sharje në mediat sociale, distancë muzikore dhe thashetheme për tradhti të supozuara, duke nxitur mjaft polemika që kanë vazhduar për javë të tëra. Sipas thashethemeve të fundit për ish-çiftin, të dy kanë arritur një marrëveshje konsensuale ndarjeje.

Sipas burimeve të afërta, Chiara Ferragni ka vendosur të merret tërësisht me mirëmbajtjen e fëmijëve të saj, Leone dhe Vittoria, duke refuzuar çdo kontribut financiar nga ish-bashkëshorti. Fedez, nga ana e tij, do të mbulonte shpenzimet e shkollës, shëndetit dhe sporteve të fëmijëve.

Avokatët përkatës (Pompilia Rossi, Alessandro Simeone dhe Andrea Pietrolucci për Fedez, dhe Daniela Missaglia për Chiara Ferragni) kanë njoftuar se pas negociatave të gjata, çifti ka nënshkruar marrëveshjen e ndarjes dhe divorcit të njëkohshëm, e cila do të depozitohet së shpejti në Gjykatën e Milanos. Më pas, gjyqtarët do të vendosin për divorcin përfundimtar brenda gjashtë muajve, duke mbyllur kështu kapitullin e një prej çifteve më të dashur dhe më të diskutuar të viteve të fundit.

Në shënimin e lëshuar nga avokatët, thuhet: “Leone dhe Vittoria do të qëndrojnë me mamin dhe babin për afërsisht të njëjtat periudha, gjatë të cilave secili prind do të kujdeset për mirëmbajtjen e tyre”. Si reperi ashtu edhe influencerja duket se synojnë ta menaxhojnë përfundimin e martesës së tyre në mënyrë paqësore, duke shmangur betejat e zgjatura ligjore.