Elon Musk, njeriu më i pasur në botë dhe një nga mbështetësit më të mëdhenj të Donald Trump, ka shpërthyer me një koment kritik lidhur me marrëveshjen mes kryeministrit Edi Rama dhe kryeministres italiane Giorgia Meloni, e cila parashikon dërgimin e emigrantëve afrikanë nga Italia në Shqipëri. Komenti i tij, bërë në rrjetin social X (Twitter), ka shkaktuar reagime të shumta, ku ai shprehet: “Ata gjykatës duhet të largohen”, duke iu referuar vendimeve të gjykatës italiane që kanë kërkuar rikthimin e emigrantëve të ardhur në Shëngjin.

Marrëveshja mes Ramës dhe Melonit ka për qëllim të menaxhojë fluksin e emigrantëve që po drejtohen drejt Italisë, duke ofruar strehim të përkohshëm për ta në Shqipëri. Kjo ka shkaktuar debate në të dyja vendet, me disa që e mbështesin për lehtësimin e presionit mbi Italinë, ndërsa të tjerë e kritikojnë për shqetësime të sigurisë dhe të drejtave të njeriut. Pas vendimit të Gjykatës së Romës, që urdhëroi dërgimin e emigrantëve në Itali, ky problem ka marrë vëmendje të gjerë.