Dy bomba janë hedhur drejt shtëpisë së kryeministrit izraelit, Benjamin Netanyahu, në qytetin verior të Izraelit, Caesarea. Në momentin e sulmit, as Netanyahu dhe as familja e tij nuk ndodheshin në shtëpi.

Policia ka njoftuar se të dyshuarit për sulmin janë arrestuar, sipas raportimeve të mediave ndërkombëtare.

Ministri izraelit Katz theksoi rëndësinë e sigurisë për kryeministrin, duke thënë: “Nuk është e mundur që kryeministri i Izraelit, i cili kërcënohet nga Irani dhe përfaqësuesit e tij që po tentojnë ta vrasin, të jetë subjekt i të njëjtave kërcënime në shtëpi.” Ai u bëri thirrje agjencive të sigurisë dhe gjyqësorit që të ndërmarrin hapat e nevojshëm për të përforcuar masat mbrojtëse.

Presidenti i Izraelit, Isaac Herzog, dënoi gjithashtu incidentin dhe konfirmoi se një hetim është duke u zhvilluar. Ministri i Sigurisë Itamar Ben-Gvir, në një deklaratë në platformën X, tha: “Kjo i kalon të gjithë kufijtë. Hedhja e një bombe në shtëpinë e Benjamin Netanyahut kalon një vijë tjetër të kuqe.”