Ngjarja tronditëse e vrasjes së një 14-vjeçari dhe plagosjes së bashkëmoshatarit të tij pranë ambienteve të një shkolle ka ngritur shqetësime të mëdha mbi sigurinë në shkolla dhe rolin e institucioneve shtetërore.

Në një deklaratë, lëvizja “Shqipëria Bëhet” ka theksuar se kjo ngjarje është një këmbanë alarmi për shoqërinë shqiptare, duke kërkuar:
•Përgjegjësi nga Ministria e Arsimit dhe Ministria e Brendshme, për të adresuar dështimet në politikat e sigurisë në shkolla.
•Vënien përpara përgjegjësisë të çdo institucioni dhe individi që ka dështuar në këtë zinxhir përgjegjësish.

Deklarata thekson se siguria në shkolla nuk është luks, por domosdoshmëri, dhe se çdo shkollë duhet të jetë një vend i sigurt ku fëmijët ndihen të mbrojtur dhe të respektuar.

Lëvizja gjithashtu ka shprehur ngushëllimet më të sinqerta për familjen e fëmijës që humbi jetën, duke nënvizuar nevojën për masa konkrete për të parandaluar përsëritjen e ngjarjeve të tilla tragjike.