Alketa Vejsiu ka reaguar me dhimbje dhe tronditje për vrasjen e 14-vjeçarit Martin Cani, duke e cilësuar ngjarjen si një goditje të rëndë për shoqërinë. Ajo e ka quajtur vrasjen një tragjedi dhe ka theksuar se ky djalë mund të ishte fëmija i dikujt tjetër, duke shprehur hidhërimin për humbjen e tij tragjike.

Në reagimin e saj, Alketa Vejsiu ka theksuar se dhuna dhe krimi janë pasojë e mungesës së dashurisë dhe edukatës, duke kritikuar mediat sociale dhe ndikimin e tyre tek të rinjtë. Ajo i ka drejtuar një mesazh fëmijëve dhe rinisë: “Mos bjer në tundim kurrë! Nuk është burrëri forcës t’i kthehesh me forcë. Je rritur me dashuri.”

Alketa ka kritikuar gjithashtu mediat digjitale, duke i akuzuar për përhapjen e modele të dhunshme dhe të pasakta që ndikojnë negativisht tek rinia. Ajo ka kërkuar një ligj që të kufizojë përdorimin e mediave sociale për nën 16 vjeç, si dhe penalizimin e profileve që përhapin gjuhë të dhunshme, shpifje dhe bullizëm.

“Spitali i vërtetë psikiatrik është online,” ka thënë Alketa, duke nënvizuar se shoqëria duhet të marrë masa urgjente për të mbrojtur të rinjtë nga përmbajtjet e dëmshme që gjejnë në internet. Ajo ka kërkuar që edhe në Shqipëri të miratohet një ligj për të kufizuar ndikimin e mediave sociale dhe për të ruajtur sigurinë e fëmijëve dhe adoleshentëve.

Vejsiu përfundon duke shprehur ngushëllime për familjen e Martin Canit, duke thënë se “Çdo shqiptar ndjen dhimbjen tuaj sot.”