Një atentat ka ndodhur ndaj 27-vjeçarit Klaudio Prendi, djali i ish-gjyqtarit Fran Prendi, i cili u qëllua me armë zjarri brenda makinës së tij në afërsi të lokalit “Artistit” në Tiranë. Sipas Kryekomisarit Asllan Shytaj, pas të shtënave, Klaudio u dërgua në spital me mjete të rastit nga persona që ndodheshin aty pranë në momentet e atentatit.

Sipas informacioneve të disponuara, qytetarët kanë njoftuar sallën operative për ngjarjen, e cila ka ndodhur pranë lokalit “Artistit”, ku Klaudio ishte brenda automjetit të tij kur është qëlluar me armë zjarri. Grupi hetimor i ngritur nga “Sektori për Krimet e Rënda” ka ndërmarrë menjëherë veprimet e nevojshme dhe ka sekuestruar pamjet filmike të vendit të ngjarjes, si dhe ka gjetur 7 gëzhoja të kalibrit 9 milimetra. Mjeti i viktimës ishte goditur disa herë, kryesisht në derën e shoferit dhe xhamin e makinës.

Hetimet e mëtejshme kanë çuar në gjetjen e armës së krimit, një pistoletë me silenciator, brenda makinës së djegur që dyshohet se është përdorur nga autorët e atentatit. Ekspertët e krimeve kanë realizuar një kontroll të dytë në makinën Audi A4, të gjetur të djegur në zonën e Farkës pas ngjarjes. Pistoleta është gjetur e dëmtuar nga djegia, dhe ende nuk është arritur të rikuperohet numri i shasisë, por kjo do të bëhet pas verifikimit të pjesëve të brendshme të motorrit.

Autoritetet vijojnë hetimet për zbardhjen e rrethanave të ngjarjes dhe për identifikimin e autorëve të atentatit.