Dhjetëra prindër dhe qytetarë marshuan sot në Tiranë për të kërkuar drejtësi dhe siguri pas vrasjes tragjike të 14-vjeçarit Martin Cani, i qëlluar me thikë nga një bashkëmoshatar në dyert e shkollës ku mësonte.

Protesta nisi në orën 11:00 nga shkolla “Fan Noli” dhe vijoi drejt Ministrisë së Arsimit. Qytetarët mbanin pankarta me mesazhe të forta si:
•“Martin Cani, një fëmijë më pak, një dështim më shumë”
•“Pse bën sikur jeton në një vend normal”
•“Heshtja jonë po na vret fëmijët. Sa viktima duhen që ne të ngremë zërin?”
•“Martin, të kemi vrarë të gjithë nga pak”

Kërkesat kryesore të protestuesve:
•Përgjegjësi institucionale për sigurinë në shkolla.
•Forcimi i masave për parandalimin e dhunës mes të rinjve.
•Ndërgjegjësim për problemet sociale që çojnë në tragjedi të tilla.

Protestuesit e cilësuan ngjarjen një dështim të institucioneve shtetërore në mbrojtjen e fëmijëve dhe shprehën shqetësimin për mungesën e sigurisë në shkolla. Ata i bënë thirrje autoriteteve që të marrin masa të menjëhershme për të parandaluar dhunën dhe për të ofruar mbështetje psikologjike për të rinjtë.

Ngjarja e rëndë ka tronditur opinionin publik dhe ka ngritur pikëpyetje të mëdha për sigurinë në institucionet arsimore dhe për rolin e familjes, shkollës dhe shoqërisë në edukimin e fëmijëve.