Me foton e Martin Canit në dorë, edhe shokët e tij të klasës u bashkuan sot marshimit protestë që vijoi drejt Ministrisë së Arsimit. Në mesin e protestuesve, një nga shokët e 14-vjeçarit rrëfeu se Martin i kishte treguar për një sherr që kishte pasur me autorin e ngjarjes, vetëm një ditë para tragjedisë.

“Ishte djalë i urtë, nuk merrej me sherre,” tha shoku i klasës së Martinit. “Të hënën më tregoi që ishte zënë me atë, por gjë tjetër nuk më ka thënë. Nuk kam përgjigje nëse mund të ishte parandaluar.”

Frika dhe rreziku nga rrjetet sociale
Adoleshenti pranoi se dhuna dhe kërcënimet në rrjetet sociale janë bërë një shqetësim i madh për të rinjtë dhe shtoi se frika është e pranishme mes tyre.

Simbolika e bojës së kuqe

Në një gjest simbolik kundër dhunës dhe vrasjeve të fëmijëve, protestuesit hodhën bojë të kuqe mbi fëmijët pjesëmarrës dhe në asfaltin para Ministrisë së Arsimit. Ky akt simbolizonte gjakun e derdhur të Martinit dhe të fëmijëve të tjerë që kanë humbur jetën për shkak të dhunës dhe mungesës së sigurisë.

Protesta vijon të bëjë thirrje për ndërgjegjësim dhe masa konkrete për të garantuar sigurinë e fëmijëve në shkolla dhe në shoqëri. Shumë qytetarë kërkojnë hetime të plota mbi rrethanat e ngjarjes dhe mbajtjen përgjegjës të institucioneve që kanë dështuar në parandalimin e saj.