I ati i Admir Demiraj, 20-vjeçarit që u plagos në “Qytet Studenti”, ka shprehur dhimbjen dhe shqetësimin e tij për ngjarjen e rëndë. Ai tha se djali i tij është jashtë rrezikut për jetën, por i duhet kohë për t’u shëruar. Me zërin e dridhur dhe sy të mbushur me lot, ai theksoi se nuk mund ta besonte që një ngjarje e tillë mund të ndodhte me djalin e tij, edhe pse kishte qenë shumë i kujdesshëm për sigurinë e fëmijëve të tij.

“Djali im është 19-vjeç, student në vit të dytë për Inxhinieri Ekonomike. Unë e di çfarë djali kam rritur dhe edukuar, por sot të gjen e pabëra kot. Sot më ndodhi mua, nesër dikujt tjetër. Problemi i madh është fakti që nuk ka fare siguri. Nuk mendoja se do më ndodhte kjo, kurrë në botë. Unë po kujdesesha që djalin e vogël, 12-vjeçarin, ta mbaja larg çdo gjëje të rrezikshme, ndërsa për të madhin as që më kishte shkuar mendja që do ndodhte diçka e tillë”, tha i ati i të plagosurit.

Ai shtoi se mjekët e kanë informuar se djali i tij është jashtë rrezikut për jetën, por do t’i duhet kohë për t’u rikuperuar. Babai i Admir Demiraj gjithashtu shprehu keqardhje për prindërit e autorit të ngjarjes, duke thënë se nuk mund të kuptonte se si dikush mund të bënte diçka të tillë.