Një video e re 16-sekondëshe ka dalë në dritë nga momenti i ekzekutimit të Klaudio Prendit, 28-vjeçarit dhe djalit të ish-gjyqtarit të Krimeve të Rënda, Fran Prendi. Në pamje shihet viktima duke u futur në automjetin e tij tip “Mercedes Benz G-Class”, kur një automjet tjetër, tip “Audi” me ngjyrë të bardhë, ndalon pranë tij. Autorët hapin zjarr me një breshëri plumbash dhe më pas largohen me shpejtësi nga vendngjarja.

Ngjarja ndodhi pas mesnatës së së hënës në rrugën “Xhanfize Keko” në Tiranë, pak pasi viktima kishte dalë nga një lokal. Autorët, pas krimit, dogjën automjetin e tyre, një “Audi” që sipas policisë ishte vjedhur një vit më parë në zonën e Liqenit Artificial.

Policia e Tiranës ka zgjeruar pistat e hetimit, duke përfshirë hipotezat e dhënies së parave me fajde, basteve sportive dhe lidhjeve të dyshimta me aktivitete jashtë vendit. Burime nga grupi hetimor sugjerojnë se konflikte të mundshme për borxhe të papaguara ndaj personave që kanë fituar shuma të mëdha në baste mund të kenë çuar në këtë krim të rëndë.

Pavarësisht përpjekjeve, autorët e vrasjes nuk janë identifikuar ende. Policia dhe grupi hetimor po vijojnë punën për të zbardhur ngjarjen dhe për të ndjekur të gjitha provat që mund të çojnë në zbulimin e përgjegjësve.