Në Gjykatën e Shkodrës është zbardhur dëshmia e katër efektivëve të forcave “Shqiponja”, të cilët u arrestuan për moszbatimin e procedurave të sigurisë në lidhje me atentatin që ndodhi më 30 tetor në Dobraç, ku humbën jetën katër persona, përfshirë Hamza Licin dhe Arlind Bushatin. Ata janë akuzuar për mosndalimin e personit të tretë misterioz që ndodhej në makinën e viktimave, dhe janë shprehur se e kuptuan se kishin të bënin me një atentat pas mbërritjes në vendngjarje.
Efektivët kanë theksuar se kishin shkuar në vendin e ngjarjes pas njoftimit për një aksident dhe, kur mbërritën, u ballafaquan me një skenë kaotike, pasi aty ndodheshin rreth 50 persona. Ata deklaruan se prioritet i tyre ishte dhënia e ndihmës së parë për të plagosurit, Arlind Bushatin dhe Bashkim Bashën, të cilët kishin mbetur të plagosur nga atentati dhe ndërmorën veprime për të siguruar vendngjarjen.
“Ne ishim patrulla e dytë që mbërritëm në vendngjarje dhe, sapo mbërritëm, e kuptuam se nuk bëhej fjalë për aksident rrugor, por për vrasje me armë zjarri. Menjëherë njoftuam sallën operative dhe ambulancën, dhe sapo mbërriti ambulanca, dhanu ndihmën e parë për të plagosurit që ishin ende gjallë,” shpjeguan ata. Sipas tyre, nuk kishin pasur asnjë informacion nëse personi i tretë i dyshuar ishte Ibrahim Lici apo dikush tjetër, pasi nuk e njihnin atë.
Gjykata e Shkodrës vendosi të lirojë nga paraburgimi katër efektivët e policisë të arrestuar nga Agjencia e Mbikëqyrjes Policore (AMP), duke i lënë me masën “detyrim paraqitje”. Përkatësisht, ata janë: Blerim Kurmekaj, Viktor Logu, Julian Sterkaj dhe Marte Martini. Gjykata gjithashtu vendosi të ndalonte daljen e tyre jashtë shtetit dhe t’i pezullonte nga detyra deri në përfundim të hetimeve.
Për këtë vendim, avokatët mbrojtës nuk ishin dakord dhe kërkuan ndryshimin e masave të sigurimit, ndërsa prokurori i çështjes, Albert Murçaj, kërkoi masën e “arrestit shtëpiak” për të dyshuarit. Hetimet për katër efektivët vijojnë, ndërsa ata do të qëndrojnë të lirë derisa të përfundojnë procedurat hetimore.
Ngjarja që çoi në arrestimin e katër efektivëve lidhet me atentatin mafioz të 30 tetorit në lagjen Dobraç të Shkodrës, ku persona të paidentifikuar qëlluan me armë zjarri ndaj automjetit tip Benz S-Class, në të cilin ndodheshin viktimat, dhe dyshohet se një person tjetër ka qenë i përfshirë, por është larguar nga vendngjarja.
