Një tjetër ngjarje tragjike ka ndodhur këtë të premte në Shqipëri, duke e bërë nëntorin një muaj të përgjakshëm. 35-vjeçari Flordian Mulaj ka ekzekutuar me armë zjarri 43-vjeçarin Artur Dauti në fshatin Dojan të Tropojës, rreth orës 13:40. Ngjarja ka ndodhur pas një konflikti mes dy personave, të cilët ishin miq dhe kishin konsumuar alkool gjatë ditës në një lokal.

Burime të afërta për mediat bëjnë me dije se, pasi kanë qenë të dehur dhe pas një sherri të shkaktuar për arsye të dobëta, Flordian Mulaj ka marrë armën e zjarrit nga banesa e tij dhe është rikthyer në lokal, ku ka qëlluar Artur Dautin, duke e lënë të vdekur në vend. Dyshohet se ky konflikt ka shpërthyer pa pasur probleme të mëparshme mes autorit dhe viktimës, përveç ngjarjes së djeshme.

Pas ekzekutimit, autori është larguar nga vendi i ngjarjes dhe është arratisur. Autoritetet policore janë vënë në ndjekje të tij dhe janë nisur forcat operacionale të Policisë së Kukësit, specialistët e Hetimit të Krimeve, dhe dy grupe të Forcës Kombëtare të Sigurisë për kapjen dhe lokalizimin e tij. Grupi hetimor, nën drejtimin e Prokurorisë, po punon për zbardhjen e plotë të rrethanave të ngjarjes dhe për dokumentimin ligjor të saj, si dhe për shoqërimin e personave të tjerë të mundshëm të përfshirë në këtë vrasje.