Mijëra persona, përfshirë ata që kanë pasur kërkesa të refuzuara për azil ose ata që kanë pasur pak mundësi për të fituar azil, janë ndihmuar financiarisht për të larguar vullnetarisht Gjermaninë këtë vit. Deri në tetor, 8,263 individë janë larguar nga Gjermania përmes një programi federal, duke përfituar mbështetje financiare për biletat e udhëtimit dhe shërbime të tjera.

Sipas Qeverisë gjermane, emigrantët e varfër mund të financohen për biletë aeroplani, autobusi ose shërbime mjekësore përmes këtij programi, me fondet e miratuara për këtë vit që arrijnë në mbi 8.2 milionë euro. Deputeti i partisë së ekstremit të djathtë, Alternativa për Gjermaninë, Leif-Erik Holm, ka thënë se shteti duhet të shfrytëzojë çdo mundësi për t’i bindur azilkërkuesit dhe të huajt tjerë që duhet të largohen sa më shpejt. Numri i personave që kanë përfituar nga ky program është më i lartë këtë vit krahasuar me vitin e kaluar.