Të gjithë punonjësit socialë të ‘Medihospes’, organit drejtues të Qendrave Italiane për riatdhesimin e emigrantëve në Shqipëri, do të largohen nga Shëngjini dhe Gjadri për t’u kthyer në Itali. Sipas raportimeve të TGCom, operatorët e qendrave të emigrantëve dhe efektivët e policisë italiane do të rikthehen në vendin e tyre brenda fundjavës.

Media italiane citon burime nga Ministria e Brendshme, të cilat theksojnë se qendrat do të mbeten funksionale dhe të mbikëqyrura, ndërkohë që stafi i nevojshëm do të jetë reduktuar dhe do të ndryshojë sipas kërkesave të momentit. Në Gjadër do të mbeten vetëm 7 punonjës të Medihospes që do të merren me administrimin dhe pastrimin e qendrës, si dhe staf shqiptar, përfshirë personelin shëndetësor.

Sipas La Repubblica, operatorët e tjerë do të kthehen në Itali të dielën, më 24 Nëntor. Ky largim pason transferimin e dytë të emigrantëve, të cilët janë kthyer në Itali pas një vendimi të Gjykatës së Romës, që ia referoi çështjen Gjykatës Evropiane të Drejtësisë.