Një ngjarje e rëndë tronditi qytetin e vogël Bettola, në provincën e Piacenzës, pasditen e 24 nëntorit. Një shqiptar 42-vjeçar u vra brutalisht përpara një lokali, ku dyshohet se është goditur tre herë me kaçavidë në qafë, sipas raportimeve të Rai1.

Ambulanca mbërriti me shpejtësi në vendngjarje, ku gjeti viktimën të shtrirë në një pellg gjaku mbi trotuar. Megjithë përpjekjet e mjekëve për t’i dhënë ndihmën e parë, shqiptari nuk mundi t’i mbijetojë plagëve të marra.

Brenda pak orësh pas incidentit, karabinierët arritën të arrestonin një bashkatdhetar të viktimës, i cili dyshohet si autori i ngjarjes. Sipas të dhënave paraprake, krimi ka ndodhur pas një debati mes dy personave, që duket se ka përfunduar në një tragjedi.

Viktima ishte baba i dy fëmijëve dhe kishte kohë që jetonte në Bettola, duke qenë një banor i njohur në komunitet. Ngjarja ka tronditur jo vetëm familjen dhe miqtë e tij, por edhe gjithë zonën, duke ngritur pikëpyetje për shkaqet e kësaj dhune të papritur.