Norvegjia është tronditur nga një rast abuzimi seksual masiv, i përshkruar si skandali më i rëndë i këtij lloji në historinë e vendit. Gjinekologu Arne Bye, 55 vjeç, po përballet me gjyq për një seri akuzash që përfshijnë përdhunimin e dhjetëra grave gjatë një periudhe 20-vjeçare.

Sipas Daily Mail, Bye, i cili ka punuar për shumë vite në një klinikë komunale në qytetin e vogël Frosta, akuzohet për përdhunimin e 87 grave dhe regjistrimin në video të sulmeve seksuale, të cilat ndodhën në klinikën e tij dhe në shtëpitë e viktimave.

Gjinekologu përballet gjithashtu me akuza për shpërdorim të pozicionit të tij për të arritur kontakte seksuale me gjithsej 94 gra, përfshirë edhe dy vajza të mitura. Viktima e tij më e madhe ishte 67 vjeç, ndërsa viktimat më të reja ishin vetëm 14 dhe 15 vjeç.

Në një zhvillim tronditës, policia ka sekuestruar më shumë se 6000 orë filmime, shumica prej të cilave përfshijnë ekzaminime gjinekologjike të regjistruara pa dijeninë e pacientëve. Bye është deklaruar fajtor për tre akuza për përdhunim dhe 35 akuza për shpërdorim të pozitës, dhe nëse shpallet fajtor për të gjitha akuzat, mund të dënohet me deri në 21 vjet burg.

Sipas aktakuzës, Bye dyshohet se ka përdorur gjatë ekzaminimeve objekte të tilla si deodorantë, shishe dhe objekte cilindrike të paidentifikuara, pa ndonjë arsye mjekësore, duke abuzuar në mënyrë sistematike me besimin e pacientëve të tij.