Një incident i frikshëm ka ndodhur në aeroportin e Antalias, ku motori i një avioni rus me 95 persona në bord mori flakë gjatë uljes. Ministria turke e Transportit ka bërë të ditur se të gjithë pasagjerët dhe ekuipazhi janë evakuuar në mënyrë të sigurt, dhe fatmirësisht nuk raportohet për të lënduar.

Avioni i tipit Sukhoi Superjet 100, operuar nga Azimuth Airlines, ishte nisur nga qyteti rus Soçi, duke transportuar 89 pasagjerë dhe 6 anëtarë të ekuipazhit. Incidenti ndodhi të dielën mbrëma, në orën 21:34 me orën lokale. Pas uljes, piloti bëri një thirrje urgjence, ndërsa ekipet e shpëtimit dhe zjarrfikësit arritën të shuanin me shpejtësi zjarrin në motor.

Azimuth Airlines deklaroi se ulja ishte e ashpër për shkak të kushteve të erës së fortë, por nuk dha detaje për shkaqet e zjarrit. Autoritetet kanë nisur hetimet për të zbuluar rrethanat e incidentit.