Udhëheqësi suprem i Iranit, Ali Khamenei, ka bërë thirrje të ashpra kundër kryeministrit izraelit Benjamin Netanyahu dhe qeverisë së tij, duke theksuar se ata duhet të dënohen me vdekje për krime lufte të kryera në Rripin e Gazës.

Khamenei e bëri këtë deklaratë gjatë një takimi me anëtarët e forcës ushtarake Basij, të lidhur me Gardën Revolucionare të Iranit, ku ai kritikoi ashpër veprimet e Izraelit dhe kërkoi një përgjigje më të ashpër ndaj liderëve izraelitë.

“Nuk mjafton vetëm një urdhër-arrest. Netanyahu dhe autoritetet izraelite duhet të dënohen me vdekje për krime lufte,” tha Khamenei, duke iu referuar veprimeve izraelite në Gaza si akte që kërkojnë dënim maksimal.

Deklarata e tij erdhi pas njoftimit nga Gjykata Penale Ndërkombëtare (ICC) javën e kaluar, e cila ka lëshuar urdhër-arreste për Netanyahu, ish-ministrin e Mbrojtjes Yoav Galant, dhe liderin e vrarë të Hamasit, Mohammed Deif, me akuza për krime lufte dhe krime kundër njerëzimit.

Ky zhvillim përforcon tensionet në Lindjen e Mesme, me Khamenei që kërkon masa ekstreme kundër liderëve izraelitë, ndërsa vendet perëndimore dhe organizatat ndërkombëtare mbeten të ndara mbi veprimet dhe përgjegjësitë për konfliktin në Gaza.