Sekretari i Përgjithshëm i Partisë Socialiste, Blendi Klosi, dhe kreu i Grupit Parlamentar të PS-së, Niko Peleshi, kanë zhvilluar sot konsultime me Presidentin e Republikës, Bajram Begaj, për caktimin e datës së zgjedhjeve të ardhshme parlamentare.

Pas takimit, Klosi deklaroi për mediat se PS ka propozuar datën 11 maj 2025 si ditën e zhvillimit të zgjedhjeve. Ai theksoi se kjo datë, që përkon me afatin më të vonë ligjor, u zgjodh për të garantuar kohë të mjaftueshme për përgatitjet e nevojshme, veçanërisht për implementimin e procesit të votimit të diasporës.

“Propozuam datën 11 maj për zgjedhjet. Datën më të fundit në afatin ligjor, për t’i dhënë mundësi procesit përgatitor për votën e diasporës,” u shpreh Klosi.

Pas përfundimit të këtij takimi në Presidencë, aty mbërriti edhe kreu i Komisionit Qendror të Zgjedhjeve, Ilirjan Celibashi, për të vijuar konsultimet në lidhje me organizimin e procesit zgjedhor.