Protesta e opozitës ka nisur me tensione dhe përplasje fizike mes qytetarëve dhe forcave të policisë. Deputetët e Partisë Demokratike, së bashku me disa mbështetës të tyre, janë konfrontuar me efektivët e sigurisë të vendosur për të liruar rrugët për qarkullimin e mjeteve.

Gjatë këtyre përplasjeve, një protestues ka humbur ndjenjat dhe është rrëzuar para mburojave të policisë, duke krijuar një situatë shqetësuese.

Në një incident tjetër pranë Bashkisë së Tiranës, policia ka ndërhyrë ndaj përfaqësuesve të opozitës, ku mes të goditurve raportohet edhe deputeti Belind Këlliçi.

Gjithashtu, në një tjetër pikë të protestës, tek Pallati me Shigjeta, deputeti Bledion Nallbati është gjakosur gjatë përplasjes me forcat e rendit.

Tensionet vijojnë, ndërsa opozita kërkon të forcojë mesazhin e saj për lirimin e liderëve të arrestuar dhe krijimin e një qeverie teknike për zgjedhjet e ardhshme.