Kreu i Partisë Demokratike, Sali Berisha, ka kërkuar publikisht nga kryeministri Edi Rama të krijojë një qeveri teknike për të çuar vendin drejt zgjedhjeve të lira. Deklarata e tij erdhi menjëherë pas vendimit të GJKKO-së për revokimin e masës së sigurisë “arrest shtëpie” ndaj tij, çka e ka rikthyer Berishën në selinë e PD-së pas gati 11 muajsh.

Berisha: “Mosbindja Civile Është Gati”
Në deklaratën e tij, Berisha paralajmëroi Ramën se nëse nuk ndërmerren hapa për formimin e një qeverie teknike, opozita do të kalojë në mosbindje civile.
“Krijo qeveri teknike, mos e zvarrit kot narkopushtetin tënd. Vetë Zoti e ka thënë që të kthehem unë, dhe unë do ta pastroj Shqipërinë. Mosbindja civile është gati. Këta burra dhe gra, djem e vajza, do të kenë liderin e tyre me vete. Piramida jote e mashtrimit sot u shkërmoq,” deklaroi ai.

Berisha theksoi se Rama do të mbajë përgjegjësi për atë që e quajti “puç shteti kundër opozitës,” duke përfshirë izolimin e tij si kryetar i PD-së dhe grabitjen e flamurit të partisë. “Krijo qeveri teknike! Pse ke frikë nga vota e shqiptarëve?” pyeti Berisha, duke ftuar qytetarët të bashkohen në luftën kundër qeverisë së Ramës.

“Fitore për Demokracinë, Por Rrugëtimi Vazhdon”
Berisha u shpreh se vendimi i GJKKO-së për lirimin e tij shënon një fitore të rëndësishme, por shtoi se beteja përfundimtare është ende përpara. Ai deklaroi se me këtë vendim, Partia Demokratike ka shtruar rrugën për të ardhur në pushtet.
“U përpoqën të asgjësonin politikisht Sali Berishën. Nuk ka shumë opozita në planet që t’i mbijetojnë një sulmi të tillë, por ne ia dolëm. Hap pas hapi fituam betejat dhe kjo vetëm falë jush dhe miqve tanë. Tashmë e kemi shtruar rrugën që do të sjellë PD-në në pushtet,” u shpreh ai.

“Shqipëria Duhet të Bëhet Vendi i Shpresës”
Berisha përmendi sulmet ndaj tij dhe familjes së tij, duke i cilësuar si përpjekje të dështuara për të njollosur figurën e tij politike.