Aktivistja shqiptare Evi Kokalari ka reaguar pas lirimit të ish-kryeministrit Sali Berisha, duke hedhur poshtë pretendimet e demokratëve se ky vendim ka ardhur si rezultat i ndikimit të administratës së presidentit të SHBA-së, Donald Trump. Në një postim në Facebook, Kokalari ka theksuar se lirimi i Berishës është një manovër e kryeministrit Edi Rama për të legjitimuar fitoren e tij në zgjedhjet e ardhshme të vitit 2025.

Ajo ka shtuar se vendimi i Gjykatës së Posaçme për ndryshimin e masës së sigurisë ndaj Berishës, që ka ndodhur pas 11 muajsh izolimi në apartamentin e tij për akuzën e korrupsionit pasiv, nuk ka lidhje me sanksionet amerikane ndaj tij, as me ndikimin e administratës Trump.

Kokalari ka përmendur gjithashtu akuzat për ndërtimin e kullës “Mali i Tiranës”, një projekt që ajo e ka cilësuar si një “shitje zgjedhjesh”, duke sugjeruar se ky mund të ketë qenë një ndër negociatat që janë bërë për të siguruar mbështetje politike në zgjedhjet e ardhshme. Ajo ka kritikuar edhe faktin që këto pazare mund të jenë përdorur për të përgatitur terrenin për fitoren e Ramës në zgjedhjet e 2025-ës.

Në reagimin e saj, Kokalari ka thënë se për të është më e rëndësishme hetimi i projektit të kullës, që ka thënë se ka “dëmshpërblim” për ata që janë bërë “kurban”, duke sugjeruar se ky proces mund të ketë pasoja të mëdha për ata që janë përfshirë.