Komuniteti afgan që jeton në Shtetet e Bashkuara ka reaguar me indinjatë pas sulmit vdekjeprurës të së mërkurës në Uashington DC, duke theksuar se i dyshuari, Rahmanullah Lakanual, 29 vjeç, nuk i përfaqëson ata. Lakanual ishte transferuar në SHBA katër vite më parë përmes një programi mbrojtjeje për afganët që kishin punuar me Shtetet e Bashkuara pas tërheqjes së trupave amerikane nga Afganistani në vitin 2021.

Sulmi la të vrarë Sarah Beckstrom, 20 vjeç, anëtare e Gardës Kombëtare, ndërsa kolegu i saj, Andrew Wolfe, 24 vjeç, po lufton për jetën.

Në përgjigje, Presidenti Donald Trump ka ndaluar përpunimin e të gjitha kërkesave për emigracion nga afganët, ka urdhëruar rishikimin e kartave të gjelbra të lëshuara për individë nga 19 vende dhe ka paralajmëruar masa më të gjera ndaj migrantëve nga ato që ai i quan “vende të botës së tretë”.

Koalicioni i Komunitetit Afgan të SHBA-së shprehu ngushëllimet për familjet e viktimave dhe bëri thirrje për një hetim gjithëpërfshirës, duke kërkuar gjithashtu që qeveria amerikane të mos pezullojë ose vonojë kërkesat për emigracion të afganëve. “Njëzet vjet partneritet afgano-amerikan nuk duhet të harrohen,” thuhet në deklaratën e koalicionit, duke rikujtuar përpjekjet dy-dekadash të SHBA për të vendosur sigurinë në Afganistan pas vitit 2001.

Afganët që jetojnë në Amerikë e kanë cilësuar sulmin si një akt të izoluar, duke u shprehur të tmerruar dhe të pikëlluar për pasojat tragjike të tij.