Kryetari i Partisë ‘Mundësia’, Agron Shehaj, ka mbyllur fushatën elektorale me një apel të fortë për qytetarët shqiptarë, duke i ftuar që më 11 maj të votojnë për një të ardhme të ndershme dhe larg politikës së vjetër. Nga Pallati i Kongreseve, ai theksoi se vendi ndodhet përballë një mundësie historike për të ndryshuar kursin, pas 35 vitesh duopol mes dy partive kryesore.

“Politikanët e këtyre dy partive mendojnë vetëm për veten e tyre, jo për ju. Prandaj krijuam ‘Mundësinë’, një vit më parë: një alternativë e vërtetë, jo thjesht një rotacion”, deklaroi Shehaj.

Ai u ndal tek rruga e vështirë e përshkuar nga partia e tij, duke përmendur presione, sulme mediatike dhe procedura gjyqësore, por tha se këto ishin provë e faktit se ndryshimi po ndodh. “Na kanë sulmuar sepse po e shohin që diçka e madhe dhe historike po ndodh në Shqipëri. Po çlirohet një potencial, një energji dhe një besim i pandalshëm”, u shpreh ai.

Shehaj nënvizoi se Partia ‘Mundësia’ përfaqëson shansin për të ndërtuar një vend ku qytetarët jetojnë nga puna e tyre, pa nepotizëm dhe pa lidhje me partitë e vjetra.

“Koha për ndryshim është tani,” ishte mesazhi final i tij për zgjedhjet e së dielës, ku Partia ‘Mundësia’ garon me numrin 10 në fletën e votimit.