Ish-zëvendëskryeministri Arben Ahmetaj ka reaguar ndaj deklaratave të Kryeministrit gjatë mbledhjes së grupit parlamentar të Partisë Socialiste, duke e akuzuar se me komentet për çështjen e tij ka shkelur parimin e prezumimit të pafajësisë dhe ka ushtruar presion ndaj drejtësisë.

Përmes një reagimi publik, Ahmetaj u shpreh se Kryeministri, gjatë mbledhjes së së hënës, foli për rastin e tij duke pretenduar se aty ka “1001 të zeza”, ndërkohë që sipas tij çështja ende nuk ka nisur të gjykohet dhe hetimet sapo janë mbyllur.

“Paraditen e të hënës në mbledhjen e grupit parlamentar të Partisë Socialiste, Kryeministri, në përpjekje për të justifikuar qëndrimet e tij, gjeti kohë të flasë edhe për rastin tim, duke pretenduar se aty paskësh ‘1001 të zeza’”, shkruan Ahmetaj.

Ai thekson se një deklaratë e tillë publike për një çështje që i takon drejtësisë përbën, sipas tij, shkelje të hapur të parimit themelor të prezumimit të pafajësisë.

Sipas ish-zëvendëskryeministrit, është paradoksale që të flitet për këtë parim nga një kryeministër që, sipas tij, e shkel atë publikisht sa herë që i leverdis politikisht.

Ahmetaj thekson se prezumimi i pafajësisë është një e drejtë themelore e garantuar nga Kushtetuta e Republikës së Shqipërisë, nga aktet ndërkombëtare për të drejtat e njeriut dhe nga legjislacioni në fuqi. Ai shton se liria e shprehjes, edhe për një kryeministër, nuk mund të përdoret për të cenuar këtë parim apo për të ushtruar ndikim mbi vendimmarrjen e organeve të drejtësisë.