Një aksident i rëndë ka ndodhur sot në mesditë në aksin Elbasan-Peqin, pranë fshatit Pajovë, ku dy automjete janë përplasur me njëra-tjetrën, duke shkaktuar një tragjedi. Një nga automjetet, pas përplasjes, ka humbur kontrollin dhe ka dalë nga rruga, duke goditur për vdekje një fëmijë 8-vjeçar që po qëndronte në trotuar.

Ngjarja e rëndë ndodhi rreth orës 14:00, në një zonë ku kufizimi i shpejtësisë është 30 km/h për shkak të afërsisë me shkollën dhe sinjalizimeve për fëmijët. Sipas dëshmive paraprake të banorëve që ndodheshin pranë vendit të ngjarjes, dyshohet se njëri prej automjeteve po udhëtonte me shpejtësi të lartë, çka mund të ketë qenë shkak i këtij aksidenti tragjik.

Policia raportoi se rreth orës 14:10, në aksin rrugor “Elbasan-Peqin”, në fshatin Pajovë, automjeti me drejtues shtetasin M. P., 39 vjeç, u përplas me një automjet tjetër të drejtuar nga shtetasi M. S., 45 vjeç. Si pasojë e përplasjes, shtetasi M. P. humbi kontrollin mbi automjetin, i cili doli nga rruga dhe përplasi të miturin 8-vjeçar, i cili ndodhej në anë të rrugës. Për fat të keq, fëmija humbi jetën në vendngjarje.

Të dy drejtuesit e automjeteve janë shoqëruar në ambientet e Policisë për veprime të mëtejshme procedurale. Përveç humbjes së jetës së fëmijës, nga aksidenti janë shkaktuar edhe dëme materiale në një ambient privat pranë vendngjarjes.