Një aksident i rëndë rrugor i ndodhur në Itali i ka marrë jetën 44-vjeçarit shqiptar, Eduart Shaka. Sipas raportimeve të mediave lokale, aksidenti ndodhi pas një përplasjeje të fortë ballore midis automjetit të tij Fiat Punto dhe një Golfi të drejtuar nga një 53-vjeçar italian nga Carbonera.

Policia mbërriti menjëherë në vendngjarje dhe gjeti Eduart Shakën disa metra larg automjetit të tij, pasi nuk kishte vendosur rripin e sigurimit në momentin e përplasjes. Nga hetimet paraprake rezulton se Golfi ndodhej në korsinë e kundërt për arsye ende të paqarta dhe përplasja ishte fatale për shqiptarin.

Drejtuesi i Golfit, i cili ka pësuar vetëm dëmtime të lehta, u dërgua në spitalin e Trevisos për trajtim mjekësor dhe është vënë nën hetim për shkelje të mundshme të rregullave të qarkullimit rrugor.

Eduart Shaka, i lindur në Durrës, ishte shpërngulur në Itali në vitin 2010 dhe jetonte në Nervesa della Battaglia së bashku me vajzën e tij. Ky aksident tragjik ka sjellë dhimbje të madhe në komunitetin shqiptar në Itali dhe në familjen e tij, e cila tani përballet me humbjen e parakohshme të kryefamiljarit. Autoritetet italiane po vijojnë hetimet për të zbardhur shkaqet e plota të ngjarjes.