Policia e Kosovës ka njoftuar se ditën e shtunë ka kryer kontrolle në shtatë lokacione në komunën e Gjilanit, pas dyshimeve se disa argjendari po ushtronin tregti të paligjshme. Si rezultat i kontrolleve, policia ka arrestuar gjashtë persona dhe ka sekuestruar përkohësisht mbi 33 kilogramë ari, mbi 14 mijë euro dhe mbi 9 mijë franga zvicerane.

Sipas njoftimit të policisë, Sektori për Hetimin e Korrupsionit në bashkëpunim me Doganën e Kosovës, pas pranimit dhe verifikimit të informatave për dyshime të tregtisë së paligjshme nga disa biznese që operonin si argjendari, ka ndërmarrë veprime operacionale në rajonin e Gjilanit. Gjatë kontrolleve në shtatë lokacione të ndryshme janë gjetur dhe sekuestruar përkohësisht:

– 33 kilogramë e 310 gramë ari
– 14,650.00 euro
– 9,720.00 franga zvicerane

Në njoftimin e policisë thuhet: “Gjilan, 01.06.2024-15:00. Sektori për Hetimin e Korrupsionit i Policisë së Kosovës në koordinim me Doganën e Kosovës pas pranimit dhe verifikimit të informatës për dyshim për tregti të paligjshme nga disa biznese që ushtronin veprimtarinë argjendarive, kanë ndërmarrë veprime operacionale në rajonin e Gjilanit duke kontrolluar shtatë (7) lokacione të ndryshme me ç’rast gjatë kontrollit janë gjetur dhe sekuestruar përkohësisht: 33kg e 310 gram ari (tridhjetë e tre kilogram e treqind e dhjetë gram ari), 14,650.00 euro dhe 9,720.00 franga zvicerane.”