Megjithëse Alvaro Morata dhe Alice Campello njoftuan ndarjen e tyre, duket se nuk është thënë ende fjala e fundit për marrëdhënien e tyre. Çifti vazhdon të mbajë një lidhje të ngushtë, dhe sipas revistës spanjolle *Hola!*, situata mes tyre është përmirësuar kohët e fundit.

Burime pranë Alice Campello-s kanë deklaruar: “Gjithçka është më e qetë. Ata flasin çdo ditë dhe po afrohen gjithnjë e më shumë. Prioriteti i tyre mbeten katër fëmijët e tyre.” Një tjetër burim shtoi: “Të dy janë shumë të rinj dhe tani, nga larg, po shohin gjithçka më qartë dhe po kuptojnë më shumë njëri-tjetrin.”

Në përpjekje për të ruajtur stabilitetin e fëmijëve, Alice ka vendosur të qëndrojë në Madrid. “Ajo dëshiron qetësi,” tha një burim i afërt me çiftin. Ndërkohë, distanca mes tyre – Alice në Spanjë dhe Morata në Milano – mund të jetë një faktor i rëndësishëm për të vlerësuar marrëdhënien dhe për të kuptuar çfarë ka ndodhur.

Disa thashetheme sugjerojnë se mund të ketë një person të tretë në mes, por kjo është mohuar nga të dy palët. Përveç këtyre spekulimeve, është diskutuar edhe për praninë e Morata-s në Raya, një aplikacion ekskluziv takimesh i përdorur nga të famshmit.

Aktualisht, megjithëse pajtimi nuk është arritur, nuk përjashtohet mundësia që në të ardhmen gjërat të marrin një drejtim të ndryshëm.