Ambasadori i Bashkimit Europian, Silvio Gonzato, i dorëzoi sot Kryetares së Kuvendit, Elisa Spiropali, Raportin e Progresit të BE-së për Shqipërinë. Spiropali e përshkroi objektivin e anëtarësimit të Shqipërisë në BE deri në vitin 2030 si një projekt ambicioz, por real.

“Aktualisht, Kuvendi, së bashku me të gjithë deputetët, do ta lexojmë Raportin me vëmendje e përgjegjësi. Jemi të vendosur të udhëheqim me sukses procesin e anëtarësimit në familjen europiane, duke bashkëpunuar ngushtë me qytetarët, shoqërinë civile dhe të gjithë faktorët që e bëjnë këtë proces gjithëpërfshirës,” theksoi Spiropali.

Ajo gjithashtu ftoi opozitën të bashkëpunojë në procesin e integrimit, duke theksuar se çdo perspektivë për Shqipërinë europiane ka vlerë, për sa kohë respektohen përgjegjësitë dhe etika demokratike e parlamentare.