Ambasadori i BE në Shqipëri, Silvio Gonzata, në një deklaratë nga Shkodra, ka theksuar rëndësinë e Reformës në Drejtësi, duke thënë se ajo jo vetëm garanton pavarësinë e sistemit të drejtësisë, por gjithashtu siguron që ky sistem të jetë i përgjegjshëm ndaj qytetarëve.
Ai shtoi se lufta kundër korrupsionit është rruga e vetme për të integruar Shqipërinë në BE, dhe se beson në institucionet e reja të drejtësisë shqiptare.
Gonzata bëri këto komente gjatë një takimi me studentë të drejtësisë në Shkodër, ku diskutoi për reformën në drejtësi dhe rolin e shoqërisë civile në sigurimin e një sistemi të drejtësisë funksional.
Ai tha se qëllimi i Reformës në Drejtësi ishte të rriste besimin e qytetarëve në institucionet, veçanërisht në drejtësinë shqiptare, për të promovuar një mjedis të shëndetshëm biznesi dhe për të tërhequr investime në vend.
“Jam këtu në Shkodër me studentë të drejtësisë për të folur për sistemin e drejtësisë, reformën në drejtësi dhe rolin që ka edhe shoqëria civile për të siguruar që reforma që u ndërmor në vitin 2016 është një reformë që jo vetëm garanton pavarësinë e sistemit të drejtësisë, por siguron që edhe sistemi i drejtësisë të jetë i përgjegjshëm ndaj qytetarëve.
Sepse qëllimi i reformës ishte pikërisht ai që t’u jepte njerëzve besim, besim te institucioni, besimi veçanërisht te drejtësia e Shqipërisë, sepse kjo është ajo që na duhet për të promovuar një mjedis të shëndetshëm biznesi, të sigurohemi që njerëzit të duan të investojnë në Shqipëri, por edhe të sigurohemi që njerëzit të marrin drejtësinë”, tha ai.
A po ndikojnë rastet e korrupsionit?
Mendoj se është shumë e rëndësishme që, institucioni i posaçëm që u krijua pikërisht për t’u marrë me rastet e nivelit të lartë të korrupsionit dhe krimit të organizuar, tani po sjell disa rezultate. Mendoj se i jep besueshmëri vendosmërisë së Shqipërisë për të luftuar korrupsionin, sepse korrupsioni është i dëmshëm për shoqërinë, është i dëmshëm për ekonominë, kështu që nëse Shqipëria dëshiron të anëtarësohet në Bashkimin Evropian, është e qartë rruga që duhet ndjekur.
Ky duhet të jetë një nga prioritetet e Shqipërisë dhe duhet të çojë në rezultate konkrete. Pra, e dini, unë kam besim në sistemin e drejtësisë shqiptare. Mendoj se thjesht duhet ta lëmë të bëjë punën e vet dhe të shohim se në çfarë do të sjelle.
Si po e përballon SPAK presionin e madh të politikës?
Shikoni, reforma e 2016-ës synonte konkretisht të garantonte që sistemi i drejtësisë të jetë i pavarur, të jetë i vetëqeverisur dhe prandaj është rezistent dhe elastik ndaj presioneve politike. Kështu që unë i diskutova këto gjëra edhe me z. Dumani dhe ai është i bindur, po bën punën e tij dhe mendoj se duhet të qëndrojë i qetë dhe të vazhdojë.
A ka presion nga politika?
Nuk më takon mua ta them, por ai (Dumani) nuk duket se ishte i shqetësuar për këtë.
Gonzata gjithashtu foli për rezultatet pozitive të operacionit policor të koduar “Recidivist”, duke theksuar se sistemi i drejtësisë duhet të vazhdojë të punojë pa u ndikuar nga presionet politike.
Përsa i përket SPAK, ai shprehu besimin se institucioni është rezistent ndaj presioneve politike dhe po bën punën e tij me pavarësi dhe përgjegjshmëri. Gonzata gjithashtu vlerësoi qëndrimin e prokurorit të përgjithshëm, z. Arben Dumani, duke thënë se ai duket i qetë dhe i përqendruar në detyrën e tij.
