“Apple” ka nisur të dërgojë njoftime sigurie për përdoruesit në 110 vende, duke i paralajmëruar për sulme të mundshme kibernetike të lidhura me programe të sofistikuara spiunazhi, të njohura si “spyware mercenar”.

Sipas të dhënave të publikuara nga TechCrunch, njoftimet shfaqen tashmë edhe drejtpërdrejt në ekranin e kyçjes së iPhone-it, krahas komunikimeve përmes emailit dhe mesazheve.

“Apple” nuk ka bërë publike listën e vendeve të përfshira dhe as nuk ka dhënë detaje mbi autorët e dyshuar të sulmeve. Kompania argumenton se publikimi i këtyre të dhënave mund t’u japë zhvilluesve të programeve spiunazhi informacion që do t’i ndihmonte të shmangnin sistemet e zbulimit.

Sipas kompanisë, këto sulme nuk synojnë zakonisht përdoruesit e zakonshëm, por persona të caktuar për shkak të profilit apo rolit të tyre, ndër të cilët gazetarë, aktivistë, politikanë dhe diplomatë.

“Apple” thekson se marrja e një njoftimi nuk do të thotë domosdoshmërisht se të dhënat e përdoruesit janë komprometuar. Paralajmërimi tregon se kompania ka identifikuar aktivitet në pajisje që është në përputhje me një sulm të mundshëm spyware.

Çfarë rekomandon Apple?

Për të rritur sigurinë, “Apple” u rekomandon përdoruesve të prekur të aktivizojnë menjëherë “Lockdown Mode”, ose Modalitetin e izolimit.

Ky funksion kufizon disa veçori të iPhone-it, përfshirë bashkëngjitjet dhe pamjet paraprake të lidhjeve, komunikimet nga kontakte të panjohura dhe disa funksione të shfletimit në internet.

Kompania paralajmëron se sulmet me spyware komercial janë të vazhdueshme dhe përhapen në shkallë globale, duke i konsideruar ato një kërcënim veçanërisht serioz për personat që mund të jenë objektiv i tyre.