Porti i Vlorës ka vijuar të regjistrojë një fluks të konsiderueshëm udhëtarësh gjatë sezonit veror, si nëpërmjet linjës së trageteve me Italinë, ashtu edhe përmes anijeve turistike që kanë sjellë vizitorë të shumtë në qytetin bregdetar.
Sipas të dhënave të bëra publike nga kapiteni i Portit të Vlorës, Lorenc Rexhepaj, për ATSH-në, numri i udhëtarëve në linjën detare Vlorë-Brindisi-Vlorë ka kaluar 45 mijë gjatë muajve të parë të vitit.
“Mbi 45 mijë pasagjerë kanë udhëtuar në linjën detare Vlorë-Brindisi-Vlorë gjatë periudhës 1 janar–12 gusht 2026”, bëri të ditur Rexhepaj.
Fluksi i udhëtarëve pritet të vijojë edhe gjatë pjesës së mbetur të sezonit veror, ndërsa Porti i Vlorës mbetet një prej pikave kryesore të lidhjes detare të Shqipërisë me Italinë dhe një destinacion i rëndësishëm për anijet turistike që vizitojnë jugun e vendit.
